వాస్తవ నేస్తం,వెబ్ డెస్క్: వచ్చే వారం సంక్రాంతి పండుగ రాబోతోంది. తెలుగు రాష్ట్రాల్లో ఇది అత్యంత ముఖ్యమైన పండుగ. ప్రతి ఏడాది ఈ సమయంలో కొత్త పంట చేతికొచ్చిన ఆనందంతో కుటుంబ సభ్యులకు బంగారం, వెండి ఆభరణాలు కొనుగోలు చేయడం సంప్రదాయంగా వస్తోంది. అయితే ఈ ఏడాది పరిస్థితి కాస్త భిన్నంగా మారింది.
గత కొన్ని రోజులుగా బంగారం, వెండి ధరలు నిరంతరంగా పెరుగుతుండటంతో పండుగ షాపింగ్ కలలా మిగిలిపోతుందేమోనని చాలా మంది ఆందోళన వ్యక్తం చేస్తున్నారు. వీకెండ్ కావడంతో శనివారం జ్యువెలరీ షాపుల వైపు వెళ్లే వారు తాజా ధరలను పరిశీలించి ముందుకెళ్లడం మంచిదని వ్యాపారులు సూచిస్తున్నారు.
జనవరి 10న తెలుగు రాష్ట్రాల్లో బంగారం ధరలు మరోసారి పెరిగాయి. గత రోజుతో పోలిస్తే 24 క్యారెట్ స్వచ్ఛమైన బంగారం ధర గ్రాముకు రూ.115 పెరిగింది. దీంతో హైదరాబాద్, వరంగల్, నిజాంబాద్, ఖమ్మం, విజయవాడ, విశాఖపట్నం, తిరుపతి, కడప వంటి ప్రధాన నగరాల్లో 24 క్యారెట్ బంగారం ధర గ్రాముకు రూ.14,046గా కొనసాగుతోంది.
అదే సమయంలో 22 క్యారెట్ బంగారం ధర కూడా పెరిగింది. ఈ నగరాల్లో 22 క్యారెట్ బంగారం గ్రాము ధర రూ.12,875గా నమోదైంది. పండుగ సీజన్ కావడంతో డిమాండ్ పెరుగుతుండటం, అంతర్జాతీయ మార్కెట్ ప్రభావం కలిసి ధరలపై ప్రభావం చూపుతున్నట్లు మార్కెట్ వర్గాలు చెబుతున్నాయి.
ఇక వెండి విషయానికి వస్తే, భారీ ర్యాలీ కొనసాగుతోంది. అంతర్జాతీయ స్థాయిలో నెలకొన్న ఉద్రిక్త పరిస్థితులు వెండి ధరలకు మద్దతుగా మారుతున్నాయని నిపుణులు చెబుతున్నారు. శనివారం ఒక్కరోజే వెండి ధర కేజీకి రూ.11,000 వరకు పెరగడం కొనుగోలుదారులకు షాక్ ఇచ్చింది.
దీంతో హైదరాబాద్, వరంగల్, నిజాంబాద్, ఖమ్మం, విజయవాడ, విశాఖపట్నం, తిరుపతి, కడప వంటి ప్రధాన నగరాల్లో కేజీ స్వచ్ఛమైన వెండి ధర రూ.2,75,000కు చేరింది. అంటే గ్రాము వెండి ధర సుమారు రూ.275 వద్ద కొనసాగుతోంది.
సంక్రాంతి సమీపిస్తున్న కొద్దీ బంగారం, వెండి ధరలు ఇంకా ఎలా మారతాయన్నదానిపై ఆసక్తి పెరుగుతోంది. కొందరు ధరలు ఇంకా పెరిగే అవకాశం ఉందని భావిస్తే, మరికొందరు పండుగ తర్వాతే కొనుగోలు చేయాలని ఆలోచిస్తున్నారు. మొత్తానికి ఈ సంక్రాంతి సీజన్లో బంగారం, వెండి మార్కెట్ షాపర్లకు కాస్త భారంగా మారింది.
Author: Qamar SD