కానీ ఇక్కడ చాలామంది ఒక కీలక విషయాన్ని పట్టించుకోవడం లేదు. అదే పన్ను ప్రభావం. సరైన ట్యాక్స్ ప్లానింగ్ లేకుండా బంగారాన్ని అమ్మితే, మీరు పొందాల్సిన లాభంలో పెద్ద భాగం పన్నులకే వెళ్లే అవకాశం ఉంటుంది. బంగారాన్ని అమ్మినప్పుడు వచ్చే లాభాన్ని ఆదాయపు పన్ను చట్టం ప్రకారం మూలధన లాభంగా పరిగణిస్తారు. ఈ లాభంపై ఎంత పన్ను చెల్లించాలి అనేది మీరు ఆ బంగారాన్ని ఎంతకాలం ఉంచుకున్నారన్నదానిపై ఆధారపడి ఉంటుంది.
మీరు బంగారాన్ని కొనుగోలు చేసిన తేదీ నుంచి 24 నెలల లోపు అమ్మితే, ఆ లాభాన్ని అల్పకాలిక మూలధన లాభంగా పరిగణిస్తారు. ఈ లాభాన్ని మీ మొత్తం ఆదాయానికి కలిపి, మీరు ఉన్న ఆదాయపు పన్ను స్లాబ్ ప్రకారం పన్ను వసూలు చేస్తారు. అధిక ఆదాయ స్లాబ్లో ఉన్నవారికి ఇది గణనీయమైన నష్టంగా మారవచ్చు.
అదే బంగారాన్ని రెండు సంవత్సరాలకు మించిన కాలం ఉంచుకుని అమ్మితే, అది దీర్ఘకాలిక మూలధన లాభంగా పరిగణిస్తారు. ప్రస్తుత నిబంధనల ప్రకారం, ఈ లాభంపై తక్కువ పన్ను రేటు వర్తిస్తుంది. దీని వల్ల పన్ను భారం స్పష్టంగా తగ్గుతుంది. పన్ను భారం తగ్గించుకోవడానికి కొన్ని మార్గాలు కూడా ఉన్నాయి. అదే ఆర్థిక సంవత్సరంలో షేర్లు లేదా మ్యూచువల్ ఫండ్లలో నష్టాలు ఎదురైతే, ఆ నష్టాలను బంగారం అమ్మకం ద్వారా వచ్చిన లాభాలతో సర్దుబాటు చేసుకోవచ్చు. దీనివల్ల మీరు చెల్లించాల్సిన మొత్తం పన్ను తగ్గే అవకాశం ఉంటుంది.
బంగారం అమ్మగా వచ్చిన దీర్ఘకాలిక లాభాన్ని నిర్ణీత కాలవ్యవధిలోపు ఒక నివాస గృహాన్ని కొనుగోలు చేయడానికి ఉపయోగిస్తే, ఆదాయపు పన్ను చట్టం ప్రకారం మినహాయింపు పొందే అవకాశం ఉంటుంది. అలాగే లాభాలను అమ్మిన ఆరు నెలల లోపు NHAI లేదా REC వంటి ప్రభుత్వ సంస్థలు జారీ చేసే క్యాపిటల్ గెయిన్ బాండ్లలో పెట్టుబడి పెట్టినా పన్ను ఆదా చేయవచ్చు.
బంగారాన్ని సన్నిహిత బంధువులకు బహుమతిగా ఇచ్చినప్పుడు పన్ను వర్తించదు. అలాగే వారసత్వంగా వచ్చిన బంగారం విషయంలో, అసలు కొనుగోలు ధర మరియు ఆ బంగారం కుటుంబంలో ఉన్న కాలపరిమితిని పరిగణలోకి తీసుకుని లాభాన్ని లెక్కిస్తారు.
మొత్తంగా చెప్పాలంటే, బంగారం అమ్మే ముందు కేవలం ధరను చూసి నిర్ణయం తీసుకోవడం సరైనది కాదు. పన్ను ప్రభావాన్ని ముందుగానే అంచనా వేసుకుని, సరైన ట్యాక్స్ ప్లానింగ్ చేస్తే మీ చేతికి వచ్చే నికర లాభం గణనీయంగా పెరుగుతుంది. ఒక్క నిమిషం ఆగి ఆలోచించిన నిర్ణయం, మీ ఆర్థిక భవిష్యత్తుకు ఉపయోగపడుతుంది.
Author: Qamar SD