Artificial Intelligence | ఏఐ మాయ.. ఉపాధి పాయ..! 

• ఫ్లెక్సీ, బ్యానర్ మేకర్ల ఆదాయానికి గండికొడుతున్న టెక్నాలజీ

కాలం మారుతోంది.. దానికి తగ్గట్టే సాంకేతికత పరుగులు తీస్తోంది. ఒకప్పుడు చేతులతో చేసే పనులన్నీ ఇప్పుడు స్మార్ట్‌ఫోన్‌లో బటన్ నొక్కితే ఇట్టే అయిపోతున్నాయి. ఆర్టిఫిషియల్ ఇంటెలిజెన్స్ (AI) రాకతో అరచేతిలోనే అద్భుతాలు సృష్టించే అవకాశం సామాన్యులకు సైతం అందుబాటులోకి వచ్చింది. కానీ, ఈ సాంకేతిక విప్లవం నాణేనికి ఒకవైపే! రెండో వైపు చూస్తే.. ఈ డిజిటల్ మాయాజాలం స్థానికంగా ఎంతో మంది ఉపాధికి ఉరితాడుగా మారుతోంది. ముఖ్యంగా పండుగలు, పబ్బాలకు కళకళలాడే ఫ్లెక్సీ, బ్యానర్ల తయారీ రంగం ఇప్పుడు ఏఐ దెబ్బకు కుదేలవుతోంది. ఒకప్పుడు దసరా, దీపావళి, వినాయక చవితి, సంక్రాంతి లాంటి పండుగలు వచ్చాయంటే.. నెల రోజుల ముందు నుంచే వీధుల్లో ఫ్లెక్సీలు, బ్యానర్లు వెలిసేవి. పుట్టినరోజులు, పెళ్లిళ్లు, రాజకీయ నాయకుల శుభాకాంక్షలు.. ఇలా ప్రతి చిన్న వేడుకకూ ఫ్లెక్సీ ఉండాల్సిందే. కానీ, ఇప్పుడు ట్రెండ్ పూర్తిగా మారిపోయింది. రకరకాల ఉచిత ఏఐ (AI) యాప్‌లు అందుబాటులోకి రావడంతో ఎవరికి వారే డిజైనర్లుగా మారిపోతున్నారు. తమ ఫోటోలను అప్‌లోడ్ చేసి, క్షణాల్లో కళ్లు చెదిరే గ్రాఫిక్స్‌తో శుభాకాంక్షల పోస్టర్లను సృష్టించుకుంటున్నారు. వాటిని వాట్సాప్ స్టేటస్‌లుగా, ఫేస్‌బుక్, ఇన్‌స్టాగ్రామ్ పోస్టులుగా పెట్టి పండుగను ముగించేస్తున్నారు.

వెలవెలబోతున్న ఫ్లెక్సీ ప్రింటింగ్ షాపులు..

ఈ డిజిటల్ ట్రెండ్ వల్ల ప్రత్యక్షంగా నష్టపోతున్నది ఫ్లెక్సీ, బ్యానర్ మేకర్లే. లక్షల రూపాయలు అప్పులు చేసి ప్రింటింగ్ మిషన్లు కొని, షాపులకు వేలకు వేలు అద్దెలు కడుతూ, విద్యుత్ బిల్లులు భరిస్తూ వ్యాపారం చేసే వారి పరిస్థితి ఇప్పుడు అగమ్యగోచరంగా మారింది. గతంలో పండుగ సీజన్ వస్తే మాకు నిద్ర ఉండేది కాదు. రాత్రింబవళ్లు మిషన్లు తిరుగుతూనే ఉండేవి. కానీ ఇప్పుడు ఆర్డర్లు సగానికి పైగా పడిపోయాయి. చిన్న చిన్న శుభకార్యాలకు, పండుగలకు ఎవరూ బ్యానర్లు కట్టడం లేదు. అంతా మొబైల్ ఫోన్లలోనే ఏఐతో ఫోటోలు తయారు చేసుకుంటున్నారు. లక్షలు పెట్టి తెచ్చిన మిషన్లు ఖాళీగా ఉంటున్నాయి” అని ఓ స్థానిక ఫ్లెక్సీ వ్యాపారి ఆవేదన వ్యక్తం చేస్తున్నారు.

ఒక బ్యానర్ వెనుక ఎంతో మంది శ్రమ..

ఏఐ యాప్‌లు క్షణాల్లో రంగుల చిత్రాలను ఇవ్వగలవు.. కానీ ఆ ఫ్లెక్సీల వెనుక ఉండే పదుల కొద్దీ కార్మికుల కడుపు నింపలేవు. ఫ్లెక్సీల తయారీ రంగంపై ఆధారపడి కేవలం ఓనర్లే కాదు.. డిజైనర్లు, మిషన్ ఆపరేటర్లు, ముడిసరుకు రవాణా చేసేవారు, చెక్క ఫ్రేములు కట్టే కూలీలు.. ఇలా ఎంతో మంది ఉపాధి పొందుతున్నారు. ఏఐ వాడకం విపరీతంగా పెరగడం వల్ల ఈ మొత్తం వ్యవస్థ రోడ్డున పడే ప్రమాదం ఏర్పడింది. నిజానికి, వాట్సాప్‌లో చూసుకునే ఓ డిజిటల్ ఫోటోకి.. మన వీధి కూడలిలో నలుగురికి కనిపించేలా కట్టిన ఫ్లెక్సీకి చాలా తేడా ఉంది. బ్యానర్ అనేది ఆత్మీయతకు, గౌరవానికి, పండుగ వాతావరణానికి ప్రతీక. భౌతికంగా కనిపించే ఒక బ్యానర్ ఇచ్చే పండుగ కళ, ఆ సందడి ఏఐ సృష్టించే ఒక వర్చువల్ ఇమేజ్‌కు ఎప్పటికీ రాదు.

సాంకేతికతను కచ్చితంగా ఆహ్వానించాల్సిందే.. దానివల్ల పనులు సులువవుతాయి. కానీ, అది స్థానిక ఉపాధిని దెబ్బతీసేలా ఉండకూడదు. డిజిటల్ శుభాకాంక్షలు ఎంత పంచుకున్నా.. ఒక భౌతికమైన ఫ్లెక్సీ తీసుకొచ్చే కళ వేరు. వచ్చే పండుగలకు, శుభకార్యాలకు కాస్త ఖర్చయినా స్థానిక ఫ్లెక్సీ మేకర్లకు ఆర్డర్లు ఇద్దాం. అలా చేయడం ద్వారా కేవలం ఒక బ్యానర్‌ను ప్రింట్ చేయించుకోవడమే కాదు.. ఈ వృత్తినే నమ్ముకున్న కొన్ని కుటుంబాలకు అండగా నిలబడిన వాళ్లం అవుతాం. టెక్నాలజీ మత్తులో పడి, మన స్థానిక వ్యాపారులను, కార్మికులను విస్మరించకూడదు.