రజాకార్లపై గర్జించిన సింహం.. పేదల పక్షపాతి ‘నరాల నారాయణ’

📰 Generate e-Paper Clip

• నేడు తెలంగాణ విమోచన దినోత్సవం సందర్భంగా సాయుధ పోరాట యోధుడికి ఘన నివాళి

తెలంగాణ విమోచన దినోత్సవం అనగానే నిజాం నిరంకుశ పాలన, రజాకార్ల దౌర్జన్యాలపై తిరగబడిన ఎందరో యోధుల త్యాగాలు గుర్తుకొస్తాయి. ఆ పోరాటంలో తన ప్రాణాలను సైతం లెక్కచేయకుండా రజాకార్ల గుండెలపై గర్జించిన వారిలో నరాల నారాయణ ఒకరు. పోతన్న, లక్ష్మీకాంతమ్మ దంపతుల ఏకైక కుమారుడైన ఆయన.. జీవితాంతం పీడిత ప్రజల పక్షాన నిలబడి అలుపెరగని పోరాటం చేశారు. ఏడవ తరగతి వరకు ఉర్దూ మీడియంలో విద్యాభ్యాసం చేసిన నారాయణ, చిన్ననాటి నుంచే సమాజంలో జరుగుతున్న అన్యాయాలను చూసి రగిలిపోయేవారు.

ఆ రోజుల్లో గ్రామీణ ప్రాంతాల్లో రజాకార్ల దౌర్జన్యాలు అత్యంత కిరాతకంగా ఉండేవి. భూమి శిస్తు పేరుతో రైతులను పీడించడం, గ్రామస్తులతో ఉచితంగా సేవలు చేయించుకోవడం, కోళ్లు, మేకలను బలవంతంగా ఎత్తుకుపోవడం పరిపాటిగా ఉండేది. ఎవరైనా ఎదురుతిరిగినా, డబ్బులు అడిగినా నడివీధిలో దారుణంగా హింసించేవారు. ఈ అకృత్యాలు, దోపిడీలకు వ్యతిరేకంగా నారాయణ తిరుగుబాటు బావుటా ఎగురవేశారు. ముఖ్యంగా బోథ్, భైంసా ప్రాంతాల్లో రజాకార్ల మూకలకు వ్యతిరేకంగా ఆయన సాగించిన పోరాటం స్ఫూర్తిదాయకం. ఆయనను పట్టుకునేందుకు రజాకార్ల గుండాలు ఎన్నోసార్లు ప్రయత్నించినా, తన చాకచక్యంతో వారి కళ్లుగప్పి అజ్ఞాతంలో ఉంటూనే ఉద్యమాన్ని ఉధృతం చేశారు.

1948లో భారత సైన్యం నిజాం రాజ్యంపై దాడి చేసి, హైదరాబాద్ సంస్థానాన్ని భారతదేశంలో విలీనం చేసిన తర్వాత నారాయణ అజ్ఞాతం వీడి జనజీవన స్రవంతిలో కలిశారు. అనంతరం కమ్యూనిస్టు (సీపీఐ) పార్టీలో చేరి ప్రజా పక్షాన తన పోరాటాన్ని కొనసాగించారు. ఆయన నిజాయితీ, పోరాట పటిమను గుర్తించిన ప్రజలు కోకస్ మన్నూర్ గ్రామ సర్పంచ్‌గా ఎన్నుకున్నారు. ఆ పదవిలో ఆయన ఏకంగా 24 ఏళ్ల పాటు కొనసాగి గ్రామాభివృద్ధికి విశేష కృషి చేశారు. సిరిచేల్మ అటవీ ప్రాంతంలో పేదలకు పోడు భూముల సాధన కోసం ఆయన చేసిన పోరాటం చారిత్రాత్మకం. పోడు వ్యవసాయం కోసం అడవులను నరుకుతున్న క్రమంలో అటవీ శాఖ అధికారులు ఆయనను అరెస్టు చేసి నిజామాబాద్ సెంట్రల్ జైలులో మూడు నెలల పాటు నిర్బంధించినా ఆయన తన ఆశయాన్ని వీడలేదు.

సీపీఐ జిల్లా కార్యవర్గ సభ్యునిగా క్రియాశీల పాత్ర పోషించిన నారాయణ, మలిదశ తెలంగాణ ఉద్యమంలోనూ కీలక ఘట్టానికి నాంది పలికారు. ఉమ్మడి ఆదిలాబాద్ జిల్లా సీపీఐ కౌన్సిల్ సమావేశంలో ప్రత్యేక తెలంగాణ రాష్ట్ర ఏర్పాటును డిమాండ్ చేస్తూ ఆయన ప్రవేశపెట్టిన తీర్మానం ఏకగ్రీవంగా ఆమోదం పొందింది. ఆ తీర్మానాన్ని రాష్ట్ర కమిటీకి పంపడంతోనే, తెలంగాణ రాష్ట్ర సాధన ఉద్యమానికి సీపీఐ మద్దతు ప్రకటించేందుకు బలమైన పునాది పడింది.

భార్య భాగుబాయి, ఇద్దరు కుమార్తెలు, ముగ్గురు కుమారులతో కూడిన కుటుంబం ఆయనది. జీవితాంతం ప్రజా సమస్యల పరిష్కారమే ధ్యేయంగా బతికిన నరాల నారాయణ తన 86వ ఏట 2011 జనవరి 10న గుండెపోటుతో తుదిశ్వాస విడిచారు. ఆయన పోరాట స్ఫూర్తిని భావితరాలకు అందించేలా, ఆయన జ్ఞాపకార్థం కుమారులు గ్రామంలో 27 అడుగుల భారీ స్తూపాన్ని నిర్మించారు. సీపీఐ రాష్ట్ర కార్యదర్శి చాడా వెంకటరెడ్డి, ఆసిఫాబాద్ మాజీ ఎమ్మెల్యే గుండా మల్లేష్ తదితర నాయకులు కళాకారుల విప్లవ గీతాల హోరు మధ్య ఈ స్తూపాన్ని ఆవిష్కరించారు. నేడు తెలంగాణ విమోచన దినోత్సవాన్ని జరుపుకుంటున్న వేళ, నాటి రజాకార్ల వ్యతిరేక పోరాట యోధుడు నరాల నారాయణ సేవలను, త్యాగాలను స్మరించుకోవడం తెలంగాణ సమాజానికిగర్వకారణం.