తీజ్ ఉత్సవాల్లో ప్రత్యేక ఆకర్షణగా చిన్నారి ‘రాథోడ్ నేహాన్వి’

• బంజారాల సంప్రదాయ నృత్యంతో ఆకట్టుకున్న చిన్నారి

• ఇచ్చోడ టీచర్స్ కాలనీలో ఉత్సాహంగా వేడుకలు

వాస్తవ నేస్తం,ఇచ్చోడ: బంజారాల సంస్కృతీ సంప్రదాయాలకు, ప్రకృతి ఆరాధనకు ప్రతీకగా నిలిచే ‘తీజ్’ ఉత్సవాలు ఇచ్చోడలో అంగరంగ వైభవంగా జరిగాయి. ఈ వేడుకల్లో ఇచ్చోడలోని టీచర్స్ కాలనీకి చెందిన చిన్నారి ‘రాథోడ్ నేహాన్వి’ ప్రత్యేక ఆకర్షణగా నిలిచి చూపరుల మనసులు దోచుకుంది. గిరిజన ప్రాంతాల్లో తొమ్మిది రోజుల పాటు అత్యంత భక్తిశ్రద్ధలతో జరుపుకునే ఈ తీజ్ పండుగలో మహిళలు, యువతులు సాంప్రదాయ దుస్తులు ధరించి నృత్యాలు చేయడం ఆనవాయితీ. అయితే, ఈ ఏడాది ఉత్సవాల్లో చిన్నారి నేహాన్వి బంజారాల అచ్చమైన సాంప్రదాయక దుస్తులు, ఆభరణాలు ధరించి ఎంతో ఉత్సాహంగా పాల్గొంది. చేతిలో తీజ్ (గోధుమ నారు) బుట్టను పట్టుకుని, గిరిజన సంప్రదాయ గీతాల లయకు అనుగుణంగా గజ్జెలు ఘల్లుమనేలా నృత్యం చేస్తూ ఉత్సవాలకే వన్నె తెచ్చింది.

చిన్న వయసులోనే తమ జాతి సంస్కృతి, పండుగల పట్ల ఆ బుజ్జాయి చూపిన ఆసక్తి, చలాకీతనం అక్కడున్న వారిని మంత్రముగ్ధులను చేశాయి. తోటి మహిళలు, యువతులతో కలిసి అలుపు లేకుండా ఆ చిన్నారి చేసిన నృత్యం అందరినీ ఆకర్షించింది. ఉత్సవాల్లో పాల్గొన్న గిరిజన పెద్దలు, స్థానికులు ఆ చిన్నారి ఉత్సాహాన్ని చూసి మురిసిపోయారు.

భావితరాలకు తమ ఘనమైన బంజారా సంస్కృతిని ఇలాగే పరిచయం చేయాలని ఈ సందర్భంగా పలువురు హర్షం వ్యక్తం చేశారు. తమ సంప్రదాయాల పరిరక్షణలో చిన్నారి నేహాన్వి భాగస్వామ్యం ప్రతి ఒక్కరికీ స్ఫూర్తిదాయకంగా నిలిచిందని స్థానికులు, బంధువులు ప్రశంసల జల్లు కురిపించారు.