వాస్తవ నేస్తం,వెబ్ డెస్క్: రిజర్వ్ బ్యాంక్ ఆఫ్ ఇండియా (RBI) ఇటీవల కాలంలో రెపో రేట్లపై తీసుకుంటున్న నిర్ణయాలు రుణగ్రహీతలకు ఊరటనిస్తున్నాయి. 2025లో ఇప్పటికే పలుమార్లు రెపో రేట్లను సవరించిన ఆర్బీఐ, ద్రవ్యోల్బణం అదుపులోకి రావడం, ఆర్థిక వృద్ధి స్థిరంగా సాగుతుండటంతో రాబోయే నెలల్లో మరోసారి రేట్ల కోత ఉండొచ్చన్న అంచనాలు బలపడుతున్నాయి. దీనికి అనుగుణంగానే బ్యాంకులు, ఎన్బీఎఫ్సీలు రుణాలపై వడ్డీ రేట్లను క్రమంగా తగ్గిస్తున్నాయి.
ఈ పరిణామాల మధ్య సామాన్యులు ఎక్కువగా ఆశ్రయించే రుణాలైన గోల్డ్ లోన్లు, పర్సనల్ లోన్లపై ఇప్పుడు అందరి దృష్టి పడింది. వడ్డీ రేట్లు తగ్గుతున్న ఈ సమయంలో ఏ లోన్ తీసుకుంటే లాభం? ప్రస్తుతం ఈ రెండు లోన్ల మధ్య అసలు తేడా ఏమిటి? అన్న సందేహాలు చాలామందిని వెంటాడుతున్నాయి.
వడ్డీ రేట్లు, షురిటీ విషయంలో అసలు తేడా ఇదే
ఎప్సిలాన్ మనీ సహ వ్యవస్థాపకుడు, సీఈవో అభిషేక్ దేవ్ ప్రకారం, రేటు తగ్గింపు చక్రంలో పర్సనల్ లోన్లు క్రమంగా చౌకగా మారే అవకాశం ఉంది. అయితే పర్సనల్ లోన్ పూర్తిగా అన్సెక్యూర్డ్ లోన్. అంటే దీనికి ఎలాంటి పూచీకత్తు అవసరం లేదు. మీ క్రెడిట్ స్కోర్, నెలవారీ ఆదాయం, ఉద్యోగ స్థిరత్వం ఆధారంగా బ్యాంకులు ఈ లోన్ను మంజూరు చేస్తాయి.
ఇదే సమయంలో గోల్డ్ లోన్ సెక్యూర్డ్ లోన్ కావడం వల్ల వడ్డీ రేట్లు సాధారణంగా తక్కువగా ఉంటాయి. మీ వద్ద ఉన్న బంగారాన్ని తాకట్టు పెట్టి లోన్ తీసుకోవాల్సి ఉంటుంది కాబట్టి బ్యాంకులకు రిస్క్ తక్కువగా ఉంటుంది. అందుకే పర్సనల్ లోన్తో పోల్చితే గోల్డ్ లోన్పై వడ్డీ రేట్లు తక్కువగా ఉంటాయి. ప్రాసెసింగ్ విషయానికి వస్తే రెండు లోన్లు కూడా వేగంగానే మంజూరవుతాయి.
ఆర్బీఐ రాబోయే సమావేశంలో మరోసారి రెపో రేటును తగ్గించే అవకాశాలు కనిపిస్తున్న నేపథ్యంలో, పర్సనల్ లోన్ వడ్డీ రేట్లు కూడా మరింత తగ్గే ఛాన్స్ ఉందని ఆర్థిక నిపుణులు చెబుతున్నారు. దీంతో ఈ రెండు లోన్ల మధ్య ఎంపిక మరింత కీలకంగా మారింది.
మీ అవసరానికి ఏ లోన్ సరిపోతుంది..?
ఈ రెండు లోన్లలో ఏది తీసుకోవాలన్నది పూర్తిగా మీ పరిస్థితులపై ఆధారపడి ఉంటుంది. మీ వద్ద బంగారం ఉండి, ఒక నిర్దిష్ట కాలంలో లోన్ మొత్తాన్ని పూర్తిగా తిరిగి చెల్లించే సామర్థ్యం ఉంటే గోల్డ్ లోన్ మంచి ఎంపికగా మారుతుంది. తక్కువ వడ్డీ, ఫ్లెక్సిబుల్ రీపేమెంట్ ఆప్షన్లు దీని ప్రధాన ప్లస్ పాయింట్లు.
అయితే బంగారం తాకట్టు పెట్టే పరిస్థితి లేకపోతే, లేదా ఆస్తులను పూచీకత్తుగా ఇవ్వాలనిపించకపోతే పర్సనల్ లోన్ సరైన ప్రత్యామ్నాయం. నెలవారీ ఈఎంఐల రూపంలో లోన్ను సులభంగా చెల్లించుకోవచ్చు. పైగా ఆన్లైన్లోనే పలు బ్యాంకులు, ఫిన్టెక్ సంస్థల ద్వారా అప్లై చేసే సౌకర్యం కూడా ఉంది.
మొత్తానికి తక్కువ వడ్డీ కావాలంటే గోల్డ్ లోన్, సౌలభ్యం కావాలంటే పర్సనల్ లోన్ అనే సూత్రాన్ని గుర్తుంచుకోవాలని నిపుణులు సూచిస్తున్నారు. రెపో రేట్ల దిశ, మీ ఆర్థిక పరిస్థితి, రీపేమెంట్ సామర్థ్యాన్ని బేరీజు వేసుకుని లోన్ ఎంపిక చేసుకుంటే భవిష్యత్లో ఒత్తిడి తప్పుతుందని వారు చెబుతున్నారు.
Author: QAMAR SD, Vaasthava Nestham
🔴 తాజా వార్తలు, బ్రేకింగ్ అప్డేట్స్ కోసం మా వాట్సాప్ ఛానల్లో వెంటనే చేరండి!
జాయిన్ వాస్తవ నేస్తం WhatsApp ఛానల్