వాస్తవ నేస్తం,బిజినెస్ డెస్క్: గత కొన్ని సంవత్సరాలుగా బంగారం పెట్టుబడిదారులకు అద్భుతమైన లాభాలను అందిస్తూ వస్తోంది. ముఖ్యంగా గత ఏడాది పసిడి ధరలు రికార్డు స్థాయిలో పెరగడంతో ఇన్వెస్టర్లు భారీ లాభాలు ఆర్జించారు. మరోవైపు సామాన్యులకైతే బంగారం కొనాలంటేనే భయపడే పరిస్థితి నెలకొంది. ఇలాంటి నేపథ్యంలో రాబోయే రోజుల్లో, ముఖ్యంగా 2026 నాటికి బంగారం ధరలు ఎలా ఉండబోతున్నాయన్న అంశంపై ప్రముఖ ఆర్థిక సంస్థలు కీలక అంచనాలను వెల్లడించాయి.
గోల్డ్మన్ సాచ్స్, JP మోర్గాన్, డ్యూష్ బ్యాంక్, మోర్గాన్ స్టాన్లీ, బ్యాంక్ ఆఫ్ అమెరికా వంటి అంతర్జాతీయ పెట్టుబడి బ్యాంకులు 2026 చివరి నాటికి బంగారం ధరలు ఔన్సుకు 4,000 డాలర్ల నుంచి 5,000 డాలర్ల మధ్య ఉండే అవకాశముందని అంచనా వేస్తున్నాయి. ఇందులో JP మోర్గాన్ మరింత ముందుకెళ్లి ఔన్సుకు 5,055 డాలర్ల వరకు బంగారం ధర పెరిగే అవకాశం ఉందని తన నివేదికలో పేర్కొంది.
ఈ అంచనాలకు ప్రధానంగా కేంద్ర బ్యాంకుల భారీ బంగారం కొనుగోళ్లు, ద్రవ్య విధానాల్లో సడలింపులు, అలాగే గ్లోబల్ ఆర్థిక అనిశ్చితి వంటి అంశాలు మద్దతుగా నిలుస్తున్నాయి. భారత కరెన్సీలో లెక్కిస్తే, బంగారం ధర ఔన్సుకు సుమారు రూ. 3.3 లక్షల నుంచి రూ. 4.25 లక్షల వరకు చేరే అవకాశం ఉందని మార్కెట్ నిపుణులు చెబుతున్నారు.
బంగారం ధరలను ముందుకు నడిపించే ప్రధాన కారణాలుగా సెంట్రల్ బ్యాంక్ రిజర్వ్ కొనుగోళ్లు, వడ్డీ రేట్ల కోతలు, సురక్షిత పెట్టుబడిగా బంగారంపై పెరుగుతున్న ఆసక్తి, ETFలు మరియు సంస్థాగత పెట్టుబడులు కీలకంగా మారుతున్నాయి. ముఖ్యంగా ప్రపంచవ్యాప్తంగా ఆర్థిక అనిశ్చితి పెరిగే కొద్దీ బంగారాన్ని ‘సేఫ్ హేవెన్’గా భావించే ధోరణి మరింత బలపడుతోందని విశ్లేషకులు అభిప్రాయపడుతున్నారు.
అయితే స్వల్పకాలికంగా బంగారం ధరల్లో చిన్న స్థాయి తగ్గుదలలు వచ్చే అవకాశాన్ని కూడా నిపుణులు పూర్తిగా కొట్టిపారేయడం లేదు. అమెరికన్ డాలర్ బలపడటం, వాస్తవ వడ్డీ రేట్లు పెరగడం, లేదా కేంద్ర బ్యాంకుల విధానాలు అంచనాలకు అనుగుణంగా లేకపోవడం వంటి పరిస్థితుల్లో బంగారం ధరలు కొంతకాలం ఒడిదుడుకులకు లోనయ్యే అవకాశం ఉందని చెబుతున్నారు.
దీర్ఘకాలికంగా మాత్రం ఎక్కువ మంది నిపుణులు బంగారం ధరలు పెరుగుతాయన్న అభిప్రాయానికే మద్దతిస్తున్నారు. పెట్టుబడిదారులు భౌతిక బంగారం రూపంలోనైనా, గోల్డ్ ETFలు లేదా ETCల రూపంలోనైనా, లేదా బంగారు మైనింగ్ కంపెనీల షేర్ల ద్వారా అయినా బంగారంలో పెట్టుబడి పెట్టే అవకాశాలు ఉన్నాయని సూచిస్తున్నారు.
కేంద్ర బ్యాంకుల డిమాండ్, వడ్డీ రేట్ల విధానం, గ్లోబల్ ఆర్థిక పరిస్థితులు, సంస్థాగత పెట్టుబడులు వంటి అంశాలు రాబోయే రోజుల్లో బంగారం ధరలను ప్రధానంగా ప్రభావితం చేయనున్నాయి. ఈ అన్ని అంశాలను పరిగణలోకి తీసుకుంటే, 2026లో బంగారం సాధారణంగా ఔన్సుకు 4,000 నుంచి 5,000 డాలర్ల పరిధిలో ట్రేడ్ అయ్యే అవకాశాలు ఎక్కువగా ఉన్నాయని మార్కెట్ వర్గాలు అంచనా వేస్తున్నాయి. అందుకే కొనుగోలుదారులు, పెట్టుబడిదారులు ఆచితూచి నిర్ణయాలు తీసుకోవాలని నిపుణులు సూచిస్తున్నారు.
Disclaimer: ఈ వెబ్సైట్లో ప్రచురితమైన అభిప్రాయాలు మరియు అంచనాలు పూర్తిగా వ్యక్తిగత విశ్లేషకులు లేదా ఇతర సంస్థలవి మాత్రమే. ఇవి అధికారిక పెట్టుబడి సలహాగా భావించరాదు. ఈ సమాచారంలోని ఖచ్చితత్వం, సమగ్రత లేదా విశ్వసనీయతపై మేము ఎలాంటి హామీ ఇవ్వడం లేదు. ఎటువంటి సెక్యూరిటీల కొనుగోలు లేదా అమ్మకాలను మేము ప్రోత్సహించము. ఈ కథనం కేవలం సమాచార మరియు విద్యాపరమైన ఉద్దేశాల కోసమే. మీరు ఏదైనా పెట్టుబడి నిర్ణయం తీసుకునే ముందు లైసెన్స్ పొందిన ఆర్థిక సలహాదారుని సంప్రదించండి.
Author: Qamar SD