గత ఏడాది (2025) ప్రపంచ మార్కెట్లో బంగారం ధరలు ఊహించని స్థాయిలో పెరిగాయి. ఈ ర్యాలీ తర్వాత 2026లో ధరలు ఎలా ఉండబోతున్నాయన్నది ఇప్పుడు అతిపెద్ద చర్చగా మారింది. కొందరు విశ్లేషకులు స్వల్పకాలంలో ధరలు తగ్గవచ్చని చెబుతుంటే, మరికొందరు దీర్ఘకాలంలో బంగారం మరింత బలపడుతుందని అంచనా వేస్తున్నారు.
ప్రస్తుతం అంతర్జాతీయ మార్కెట్లో స్పాట్ గోల్డ్ ధర సుమారు $4,630/ఔన్సు వద్ద ట్రేడవుతోంది. ఇది గత ఏడాది నమోదైన రికార్డు స్థాయిల తర్వాత వచ్చిన స్థిరీకరణ దశగా భావిస్తున్నారు. ఈ సమయంలోనే స్టాండర్డ్ చార్టర్డ్ బ్యాంక్ విడుదల చేసిన తాజా నివేదిక మార్కెట్లో చర్చనీయాంశంగా మారింది.
స్టాండర్డ్ చార్టర్డ్ టార్గెట్లు.. బంగారం ఎటు వైపు..?
స్టాండర్డ్ చార్టర్డ్ తన తాజా అంచనాల్లో 2026పై సానుకూల దృక్పథం వ్యక్తం చేసింది. బ్యాంక్ ప్రకారం:
- 3 నెలల లక్ష్యం: సుమారు $4,350/ఔన్సు
- 12 నెలల లక్ష్యం: $4,800/ఔన్సు వరకు చేరే అవకాశం
ఈ అంచనాలకు ప్రధాన కారణాలుగా విశ్లేషకులు మూడు అంశాలను చెబుతున్నారు:
- కేంద్ర బ్యాంకుల గోల్డ్ కొనుగోళ్లు పెరగడం
- ద్రవ్యోల్బణ పరిస్థితులు
- వడ్డీ రేట్ల భవిష్యత్తు దిశ
ఇక ANZ బ్యాంక్ కూడా ఇదే తరహా అభిప్రాయం వ్యక్తం చేస్తూ, 2026 మధ్య నాటికి బంగారం $5,000/ఔన్సు స్థాయికి చేరే అవకాశముందని పేర్కొంది. అంటే బంగారం ఇంకా ఇన్వెస్టర్లకు కీలక ఆస్తిగా కొనసాగవచ్చన్న సంకేతం స్పష్టంగా కనిపిస్తోంది.
బంగారం భవిష్యత్తును నిర్ణయించే కీలక అంశాలు..
వడ్డీ రేట్లు: వడ్డీ రేట్లు తగ్గితే బంగారానికి డిమాండ్ పెరుగుతుంది. ఫెడ్ మళ్లీ రేట్లు పెంచితే మాత్రం తాత్కాలిక ఒత్తిడి కనిపించవచ్చు.
కేంద్ర బ్యాంకుల డిమాండ్: ప్రపంచవ్యాప్తంగా అనేక దేశాలు తమ విదేశీ మారక నిల్వల్లో బంగారాన్ని పెంచుకుంటున్నాయి. ఇది దీర్ఘకాలంలో ధరలకు బలమైన మద్దతుగా నిలుస్తోంది.
గోల్డ్ ETFలపై ఆసక్తి: పెద్ద ఇన్వెస్ట్మెంట్ ఫండ్లు, సంస్థాగత పెట్టుబడిదారులు ETFల ద్వారా బంగారంలో పెట్టుబడులు పెంచుతున్నారు. ఈ ధోరణి కొనసాగితే ధరలు స్థిరంగా ఉండే అవకాశం ఎక్కువ.
జియోపాలిటికల్ టెన్షన్స్: యుద్ధాలు, వాణిజ్య ఉద్రిక్తతలు, గ్లోబల్ ఆర్థిక అనిశ్చితి పెరిగినప్పుడు బంగారం “సేఫ్ హేవెన్” ఆస్తిగా మరింత డిమాండ్ పొందుతుంది.
స్వల్పకాలంలో కొంత ప్రైస్ కరెక్షన్ కనిపించొచ్చు. అయితే 2026 చివరినాటికి బంగారం $4,400 – $4,900/ఔన్సు మధ్య ఉండొచ్చని ఎక్కువ మంది అనలిస్టులు అంచనా వేస్తున్నారు. పరిస్థితులు మరింత అనుకూలంగా మారితే ఈ స్థాయిని మించిపోయే అవకాశమూ ఉంది. తక్కువ కాలంలో హెచ్చుతగ్గులు ఉండొచ్చు.. కానీ దీర్ఘకాలంలో బంగారం ఇంకా బలంగానే కనిపిస్తోంది.
Author: Qamar SD, Vaasthava Nestham
🔴 తాజా వార్తలు, బ్రేకింగ్ అప్డేట్స్ కోసం మా వాట్సాప్ ఛానల్లో వెంటనే చేరండి!
జాయిన్ వాస్తవ నేస్తం WhatsApp ఛానల్