కూల్చివేతల్లేవ్.. రీ-కన్‌స్ట్రక్షన్ అసలే లేదు..!!

• జాకీలతో అమాంతం పైకి లేస్తున్న ఇల్లు..!

• ఇచ్చోడలో ఆధునిక సాంకేతికతతో హౌస్ లిఫ్టింగ్ పనులు.. ఆసక్తిగా తిలకిస్తున్న జనం

వాస్తవ నేస్తం,ఇచ్చోడ : అభివృద్ధి పనుల్లో భాగంగా రోడ్ల ఎత్తు క్రమంగా పెరుగుతుండటంతో, రోడ్డు పక్కనే ఎన్నో ఏళ్ల క్రితం నిర్మించిన పాత నివాస భవనాలు లోతట్టు ప్రాంతాలుగా మారిపోతున్నాయి. ఫలితంగా వర్షాకాలం వచ్చిందంటే చాలు రోడ్డుపై ప్రవహించే మురుగునీరు, వరద నీరు నేరుగా ఇళ్లలోకి చేరి నివాసితులు తీవ్ర ఇబ్బందులు పడుతున్నారు. ఇలాంటి క్లిష్ట పరిస్థితుల్లో ఇంటిని కూల్చి మళ్లీ కొత్తగా నిర్మించుకోవాలంటే లక్షలాది రూపాయల ఖర్చుతో పాటు ఎంతో సమయం, శ్రమ వృథా అవుతాయి. అయితే ఇంటిని ఏమాత్రం కూల్చకుండా, భవనాన్ని అలాగే ఉంచి ఆధునిక సాంకేతిక పరిజ్ఞానంతో పైకి లేపుతున్న దృశ్యం ఆదిలాబాద్ జిల్లా ఇచ్చోడ మండల కేంద్రంలో స్థానికులను ఎంతగానో ఆకట్టుకుంటోంది.

ఇచ్చోడ మండల కేంద్రంలోని బాలాజీ హాస్పిటల్ ఎదురుగా ఉన్న ఒక నివాస భవనం రోడ్డు లెవల్ కంటే బాగా కిందకు ఉంది. దీంతో ఇంటి యజమాని సంప్రదాయ పద్ధతుల్లో కాకుండా ఆధునిక ‘హౌస్ లిఫ్టింగ్’ టెక్నాలజీని ఆశ్రయించారు. గత పదిహేను రోజులుగా ఈ భవనం వద్ద నిరంతరాయంగా లిఫ్టింగ్ పనులు సాగుతున్నాయి. హైడ్రాలిక్ జాకీలను ఇంటి పునాదుల కింద అత్యంత పకడ్బందీగా అమర్చి, భవనానికి ఎలాంటి పగుళ్లు రాకుండా దశలవారీగా నెమ్మదిగా పైకి లేపుతున్నారు. నేలమట్టం నుంచి భారీ భవనం అమాంతం పైకి లేస్తుండటాన్ని చూసేందుకు పరిసర ప్రాంతాల ప్రజలు పెద్ద సంఖ్యలో తరలివస్తున్నారు.

ఈ భారీ పనులను హర్యానా రాష్ట్రానికి చెందిన నిపుణులైన ‘హౌసింగ్ లిఫ్టింగ్ సర్వీస్’ బృందం పర్యవేక్షిస్తోంది. అత్యున్నత ఇంజనీరింగ్ ప్రమాణాలు పాటిస్తూ, భవన నిర్మాణ స్థిరత్వానికి ఎలాంటి ముప్పు వాటిల్లకుండా పనులు చేపడుతున్నట్లు బృందం ప్రతినిధి శివ తెలిపారు. తమ సంస్థకు దేశవ్యాప్తంగా భవనాలను పైకి లేపడం, అవసరమైతే ఉన్న ప్రదేశం నుంచి ఇతర ప్రాంతాలకు జరపడంలో (హౌస్ షిఫ్టింగ్) సుదీర్ఘ అనుభవం ఉందని ఆయన పేర్కొన్నారు. ఆధునిక హైడ్రాలిక్ జాకీల వ్యవస్థ ద్వారా భవనం గోడలకు, పిల్లర్లకు ఎలాంటి డ్యామేజ్ లేకుండా సురక్షితంగా పైకి లేపుతున్నామని, కొత్త ఇల్లు కట్టే ఖర్చుతో పోలిస్తే ఇది అత్యంత చౌకైన మరియు నమ్మకమైన పరిష్కారమని ఆయన స్పష్టం చేశారు. ఎటువంటి నష్టం లేకుండా కొద్ది రోజుల్లోనే సమస్య పరిష్కారం అవుతుండటంతో స్థానికులు ఈ సాంకేతికత పట్ల హర్షం వ్యక్తం చేస్తున్నారు.