వాస్తవ నేస్తం,ఇంటర్నెట్ డిస్క్: బంగారం కొనాలనుకునే వారికి శుభవార్త. గత కొన్ని రోజులుగా ఆకాశాన్ని తాకిన పసిడి ధరలు ఇప్పుడు కాస్త చల్లబడుతున్నాయి. జనవరి 3వ తేదీ, శనివారం నాటి బంగారం ధరలు చూస్తే వరుసగా రెండో రోజు కూడా తగ్గుదల కొనసాగుతున్నట్లు స్పష్టంగా కనిపిస్తోంది.
తాజా ధరల ప్రకారం, 24 క్యారెట్ల 10 గ్రాముల బంగారం ధర రూ.1,38,240గా ఉంది. అదే సమయంలో 22 క్యారెట్ల 10 గ్రాముల బంగారం ధర రూ.1,25,250 వద్ద ట్రేడ్ అవుతోంది. మరోవైపు ఒక కేజీ వెండి ధర రూ.2,38,732గా నమోదైంది. గడచిన రెండు రోజుల ధరల కదలికలను గమనిస్తే, బంగారం ధరలు నెమ్మదిగా తగ్గుముఖం పట్టినట్లు తెలుస్తోంది. ఇటీవలే పసిడి ధరలు రూ.1.45 లక్షల ఆల్టైమ్ రికార్డు స్థాయిని తాకిన విషయం తెలిసిందే. అక్కడి నుంచి ఇప్పుడు ధరలు క్రమంగా వెనక్కి వస్తున్నాయి.
అంతర్జాతీయ మార్కెట్లలో బంగారం ధరలు తగ్గడం దీనికి ప్రధాన కారణంగా కనిపిస్తోంది. ఒక ఔన్స్ బంగారం ధర ఇటీవల 4,550 డాలర్ల ఆల్టైమ్ హై నుంచి ప్రస్తుతం 4,300 డాలర్ల స్థాయికి దిగివచ్చింది. ఈ ప్రభావం దేశీయ మార్కెట్లపై కూడా స్పష్టంగా కనిపిస్తోంది.
గత రెండు వారాలుగా బంగారం ధరల్లో తీవ్ర హెచ్చుతగ్గులు చోటుచేసుకున్నాయి. గత వారం రికార్డు స్థాయిని తాకిన ధరలు, ఆ తర్వాత నెమ్మదిగా తగ్గడం ప్రారంభించాయి. ఈ వారం మొత్తం తగ్గుదల ట్రెండ్ కొనసాగుతోంది.
నిపుణుల మాట ప్రకారం, ధరలు తగ్గడానికి ప్రధాన కారణం ఇన్వెస్టర్ల ప్రాఫిట్ బుకింగ్. భారీ లాభాలు వచ్చిన నేపథ్యంలో చాలామంది పెట్టుబడిదారులు అమ్మకాలు చేయడంతో మార్కెట్లో ఒత్తిడి ఏర్పడింది. అయితే రిటైల్ మార్కెట్లో మాత్రం బంగారం ధరలు ఇంకా పూర్తిస్థాయిలో తగ్గలేదని వ్యాపారులు చెబుతున్నారు.
ధరలు భారీగా పెరిగిన కారణంగా బంగారు ఆభరణాల కొనుగోళ్లు తగ్గాయని జ్యువెలరీ వ్యాపారులు వాపోతున్నారు. ముఖ్యంగా పెళ్లిళ్లు, శుభకార్యాల కోసం కొనుగోలు చేసే వారు కూడా కాస్త ఆలోచనలో పడుతున్నారని చెబుతున్నారు.
వెండి ధరల విషయానికి వస్తే, అవి కూడా ఆల్టైమ్ రికార్డు స్థాయి నుంచి కాస్త తగ్గుముఖం పట్టాయి. అయినప్పటికీ అంతర్జాతీయ మార్కెట్లలో వెండి ధరలు ఇప్పటికీ రికార్డు స్థాయిలకు సమీపంలోనే ట్రేడ్ అవుతున్నాయి. దీంతో వెండి మార్కెట్లో కూడా హెచ్చుతగ్గులు కొనసాగుతున్నాయి.
మొత్తంగా చూస్తే, పసిడి ధరలు కొంత తగ్గడం బంగారం కొనుగోలు చేయాలనుకునే వారికి ఊరటనిస్తోంది. అయితే రాబోయే రోజుల్లో అంతర్జాతీయ మార్కెట్ కదలికలు ధరల దిశను నిర్ణయించనున్నాయి.
Disclaimer:
ఈ కథనం కేవలం సమాచార నిమిత్తం మాత్రమే. ఇది పెట్టుబడి లేదా వ్యాపార సలహాగా భావించరాదు. బంగారం, వెండి సహా అన్ని పెట్టుబడులు మార్కెట్ రిస్క్లకు లోబడి ఉంటాయి. పెట్టుబడి నిర్ణయాలు తీసుకునే ముందు అర్హత కలిగిన ఆర్థిక నిపుణులను సంప్రదించడం ఉత్తమం.
– QAMAR SD