వాస్తవ నేస్తం,బిజినెస్ డెస్క్: 2025లో బంగారం, వెండి ధరలు సృష్టించిన చారిత్రక రికార్డులు సామాన్యుల నుంచి పెట్టుబడిదారుల వరకు అందరినీ ఆశ్చర్యపరిచాయి. అయితే ఈ ధరల పెరుగుదల ఇక్కడితో ముగుస్తుందని భావిస్తే అది పొరపాటేనని మార్కెట్ నిపుణులు స్పష్టం చేస్తున్నారు.
ప్రపంచవ్యాప్తంగా కొనసాగుతున్న ఆర్థిక అనిశ్చితి, జియోపాలిటికల్ టెన్షన్స్, సెంట్రల్ బ్యాంకుల భారీ కొనుగోళ్లు, డాలర్ బలహీనత వంటి కారణాలతో బంగారం, వెండి పై డిమాండ్ మరింత పెరుగుతోంది. ఈ నేపథ్యంలో 2026లో కూడా ఈ విలువైన లోహాలు కొత్త శిఖరాలను తాకే అవకాశముందని విశ్లేషకులు అంచనా వేస్తున్నారు.
ఇండియా బులియన్ అండ్ జ్యువెలర్స్ అసోసియేషన్ (IBJA), MCX నుంచి వచ్చిన తాజా డేటాను పరిశీలిస్తే ఇప్పటికే మార్కెట్ వేడి పెరిగినట్లు స్పష్టంగా కనిపిస్తోంది. గత వారం MCXలో బంగారం 10 గ్రాములకు రూ.1,38,875 స్థాయికి చేరింది. స్పాట్ మార్కెట్లో 24 క్యారెట్ల బంగారం ధర కూడా రూ.1,37,000 పైగా ట్రేడ్ అవుతోంది.
వెండి విషయానికి వస్తే పరిస్థితి మరింత హాట్గా ఉంది. MCXలో మార్చి గడువు ముగిసిన వెండి ధర కిలోగ్రాముకు రూ.2,52,000 దాటింది. ఇది వెండి తన పాత శ్రేణిని బ్రేక్ చేసి బలమైన బుల్లిష్ దశలోకి ప్రవేశించిందని సూచిస్తోంది. ఈ ధరల పెరుగుదల కేవలం పెళ్లిళ్ల సీజన్ కారణంగా మాత్రమే కాకుండా, ప్రపంచవ్యాప్తంగా ఉన్న పరిస్థితుల ప్రభావం కూడా కావడం గమనార్హం.
వెండి రూ.3 లక్షలు.. బంగారం రూ.2 లక్షలు? 2026 అంచనాలు షాక్ ఇస్తున్నాయి
గత ఏడాది వెండిలో పెట్టుబడి పెట్టిన పెట్టుబడిదారులకు ఊహించని లాభాలు వచ్చాయి. 2025లో బంగారం సుమారు 66 శాతం రాబడిని అందించగా, వెండి మాత్రం 170 శాతం కంటే ఎక్కువ లాభాన్ని ఇచ్చింది. దీంతో ఇప్పుడు అందరి దృష్టి 2026పై నిలిచింది.
మార్కెట్ నిపుణుల అంచనాల ప్రకారం, 2026 చివరి నాటికి అంతర్జాతీయ మార్కెట్లో బంగారం ధర ఔన్సుకు 5,000 డాలర్ల స్థాయిని చేరే అవకాశం ఉంది. దీనిని భారత రూపాయలలో లెక్కిస్తే దేశీయంగా 10 గ్రాముల బంగారం ధర రూ.1.70 లక్షల నుంచి రూ.2 లక్షల మధ్య ఉండవచ్చని అంచనా వేస్తున్నారు.
వెండి అంచనాలు అయితే మరింత సంచలనంగా ఉన్నాయి. అంతర్జాతీయ మార్కెట్లో వెండి ఔన్సుకు 100 డాలర్ల స్థాయిని చేరే అవకాశం ఉందని విశ్లేషకులు చెబుతున్నారు. అదే జరిగితే భారత మార్కెట్లో వెండి ధర కిలోగ్రాముకు రూ.2.8 లక్షల నుంచి రూ.3.3 లక్షల మధ్య ఉండవచ్చని సమాచారం.
మొత్తానికి 2026లో కూడా బంగారం, వెండి ధరలు తగ్గే సూచనలు కనిపించడం లేదు. పెట్టుబడిదారులకే కాదు, సాధారణ కొనుగోలుదారులకూ ఈ ధరల దూకుడు కొత్త సవాలుగా మారే అవకాశం ఉందని మార్కెట్ వర్గాలు అభిప్రాయపడుతున్నాయి.
Author Name: Qamar SD V
aasthavanestham News Desk