వాస్తవ నేస్తం, బిజినెస్ డెస్క్: కొత్త సంవత్సరానికి ముందే పసిడి ప్రియులకు ఊహించని షాక్ తగిలింది. గత రెండు రోజులుగా బంగారం, వెండి ధరలు భారీగా పడిపోతుండగా.. డిసెంబర్ 31న కూడా అదే ట్రెండ్ కొనసాగుతోంది. అంతర్జాతీయ పరిణామాలతో పాటు యూఎస్ ఫెడరల్ రిజర్వ్ నుంచి వచ్చిన తాజా సంకేతాలు ఈ ధరల పతనానికి ప్రధాన కారణంగా మారాయి.
ఇటీవలి కాలంలో ఫెడ్ వడ్డీ రేట్ల తగ్గింపు నిర్ణయాలు బంగారం, వెండి ధరలను ఆల్ టైమ్ హై స్థాయిలకు తీసుకెళ్లిన విషయం తెలిసిందే. అయితే ఇప్పుడు పరిస్థితి పూర్తిగా మారినట్లు కనిపిస్తోంది.
ఫెడ్ నిర్ణయాలు.. మార్కెట్పై ప్రభావం | US Fed Impact on Gold & Silver
సాధారణంగా యూఎస్ ఫెడరల్ రిజర్వ్ వడ్డీ రేట్లను తగ్గిస్తే బంగారం, వెండి వంటి విలువైన లోహాలు మరింత ఆకర్షణీయంగా మారతాయి. డిసెంబర్లో ఫెడ్ రేట్లను తగ్గించడంతో బంగారం ధరలు ఒక్కసారిగా ఎగబాకాయి. ఇక వచ్చే ఏడాదిలో కూడా వడ్డీ రేట్లు తగ్గుతాయన్న అంచనాలతో పసిడి ఆల్ టైమ్ గరిష్ఠాలకు చేరింది.
అయితే తాజాగా వెలువడిన ఫెడ్ మినిట్స్ రిపోర్ట్ మార్కెట్ను తలకిందులు చేసింది. వడ్డీ రేట్లను ఇకపై తగ్గించడంపై ఫెడ్ సభ్యుల మధ్య భిన్నాభిప్రాయాలు ఉన్నట్లు వెల్లడైంది. ద్రవ్యోల్బణం తగ్గుతున్నప్పటికీ, రేట్ల కోతపై జాగ్రత్త అవసరమని మెజారిటీ సభ్యులు అభిప్రాయపడటంతో ఇన్వెస్టర్లు అమ్మకాలకు మొగ్గు చూపారు.
అంతర్జాతీయంగా భారీ కరెక్షన్ | Global Market Correction
ఇదే సమయంలో రష్యా–ఉక్రెయిన్ యుద్ధం ముగింపు దశకు చేరుతోందన్న ప్రకటనలు కూడా బంగారం ధరలపై ప్రభావం చూపాయి. అమెరికా అధ్యక్షుడు డొనాల్డ్ ట్రంప్ చేసిన వ్యాఖ్యలతో ఇన్వెస్టర్లు లాభాల స్వీకరణకు దిగారు. దీంతో స్పాట్ గోల్డ్ ధర ఔన్సుకు 4,549 డాలర్ల గరిష్ఠం నుంచి ఒక దశలో 4,320 డాలర్లకు పడిపోయింది.
వెండి ధరలు కూడా అదే బాటలో 84 డాలర్ల నుంచి 70 డాలర్ల స్థాయికి క్షీణించాయి. తరువాత స్వల్పంగా పుంజుకున్నప్పటికీ.. డిసెంబర్ 31న మరోసారి భారీ పతనం నమోదైంది. ప్రస్తుతం స్పాట్ గోల్డ్ 4,300 డాలర్ల దిగువన, వెండి 71 డాలర్ల వద్ద ట్రేడవుతోంది.
దేశీయ మార్కెట్లో ధరల షాక్ | Gold & Silver Fall in India
మల్టీ కమోడిటీ ఎక్స్చేంజ్ (MCX)లో కూడా బంగారం ధరలు ఒక శాతానికి పైగా పడిపోయాయి. వెండి అయితే 6 శాతానికిపైగా కుప్పకూలింది. గోల్డ్ 10 గ్రాములకు రూ. 1,35,618 వద్ద ట్రేడవుతుండగా.. మార్చి ఫ్యూచర్స్ ధరలు మరింత తగ్గాయి. వెండి రేటు ఒక్కరోజులోనే రూ. 13 వేలకుపైగా పడిపోయినట్లు తెలుస్తోంది. (US Fed Impact on Gold Prices)
హైదరాబాద్ మార్కెట్లో కిలో వెండి ధర ప్రస్తుతం రూ. 2.58 లక్షల వద్ద ఉంది. ఈ తగ్గింపు ప్రభావం జనవరి 1న నగర మార్కెట్లలో మరింత స్పష్టంగా కనిపించే అవకాశం ఉందని వ్యాపార వర్గాలు చెబుతున్నాయి.
ఏ జువెల్లరీలో గ్రాము బంగారం ఎంత? | Jewellery-wise Gold Rates
దేశీయంగా కూడా బంగారం ధరలు వరుసగా తగ్గుతున్నాయి. హైదరాబాద్లో డిసెంబర్ 31న 22 క్యారెట్ల బంగారం తులానికి రూ. 900 తగ్గి రూ. 1,23,950కు చేరింది. గత రెండు రోజుల్లోనే రూ. 5,700 మేర తగ్గడం గమనార్హం.
లలితా జువెల్లరీలో గ్రాము బంగారం ధర రూ. 12,395గా ఉంది. తనిష్క్ జువెల్లరీలో గ్రాము ధర రూ. 12,525గా నమోదైంది. (US Fed Impact on Gold Prices) ఖజానా, మలబార్ గోల్డ్, కళ్యాణ్ జువెల్లర్స్, జోయాలుక్కాస్లలో గ్రాము బంగారం ధర సుమారు రూ. 12,395 వద్ద కొనసాగుతోంది.
జువెల్లరీ కొనుగోలు సమయంలో మేకింగ్ ఛార్జీలు వేర్వేరుగా ఉండగా.. బిల్లుపై అదనంగా 3 శాతం జీఎస్టీ వర్తిస్తుందని కొనుగోలుదారులు గుర్తుంచుకోవాలి.