* కేసు సెటిల్ చేశానని నమ్మించి డబ్బులు గుంజిన కేటుగాడు
* బెదిరించి మరీ వసూళ్లు.. అరెస్ట్ చేసిన ఇచ్చోడ పోలీసులు
* నిందితుడికి 15 రోజుల రిమాండ్
వాస్తవ నేస్తం,ఇచ్చోడ : పోలీసుల పేరుతో సెటిల్మెంట్లు చేస్తున్నానంటూ అమాయకులను బెదిరించి డబ్బులు వసూలు చేస్తున్న ఒక వ్యక్తిని ఇచ్చోడ పోలీసులు అరెస్ట్ చేసి రిమాండ్కు తరలించారు. ఈ ఘటనకు సంబంధించిన వివరాలను ఇచ్చోడ ఎస్హెచ్ఓ నరేష్ కుమార్ శుక్రవారం మీడియాకు వెల్లడించారు. ఎస్హెచ్ఓ వెల్లడించిన వివరాల ప్రకారం.. ఇచ్చోడ మండల కేంద్రంలోని రంజాన్పురా కాలనీకి చెందిన షేక్ రేహాన్ మరియు అతని స్నేహితులపై గతంలో ఓ కేసు నమోదైంది. ఆ కేసు వ్యవహారంలో వారు న్యాయస్థానంలో జరిమానా చెల్లించడంతో అది ముగిసిపోయింది. అయితే, ఇదే అదనుగా భావించిన ఇచ్చోడకే చెందిన షేక్ ఆరిఫ్ అనే వ్యక్తి వారిని బురిడీ కొట్టించే ప్రయత్నం చేశాడు. ఆ పెట్టీ కేసును తానే స్వయంగా పోలీసులతో మాట్లాడి మాఫీ చేయించానని నమ్మించాడు. అందుకు ప్రతిఫలంగా ఒక్కొక్కరి నుంచి రూ.1,000 చొప్పున మొత్తం రూ.5,000లు ఇవ్వాలని డిమాండ్ చేసి బలవంతంగా వసూలు చేశాడు. అంతేకాకుండా ఈ విషయాన్ని బయట ఎవరికైనా చెబితే ప్రాణాలు తీస్తానని బాధితులను తీవ్రంగా బెదిరించాడు.
నిందితుడి బెదిరింపులతో భయాందోళనకు గురైన బాధితుడు షేక్ రేహాన్ పోలీసులకు ఫిర్యాదు చేశాడు. ఈ ఫిర్యాదుపై కేసు నమోదు చేసిన పోలీసులు లోతైన దర్యాప్తు చేపట్టారు. విచారణలో షేక్ ఆరిఫ్ డబ్బులు వసూలు చేసి, బెదిరింపులకు పాల్పడినట్లు ఆధారాలతో సహా నిర్ధారణ కావడంతో అతడిని పోలీసులు అరెస్ట్ చేశారు. అనంతరం నిందితుడిని న్యాయస్థానం ముందు హాజరుపరచగా, న్యాయమూర్తి అతనికి 15 రోజుల రిమాండ్ విధించినట్లు ఎస్హెచ్ఓ నరేష్ కుమార్ తెలిపారు. ప్రజలు అప్రమత్తంగా ఉండాలి: ఎస్హెచ్ఓ నరేష్ కుమార్ పోలీసుల పేరు చెప్పి ఎవరైనా డబ్బులు డిమాండ్ చేసినా, భయభ్రాంతులకు గురిచేసినా అస్సలు నమ్మవద్దని ఎస్హెచ్ఓ నరేష్ కుమార్ ఈ సందర్భంగా ప్రజలను కోరారు. దళారులను ఆశ్రయించి మోసపోవద్దని, ఎవరైనా అలా డబ్బులు వసూలు చేయడానికి ప్రయత్నిస్తే వెంటనే స్థానిక పోలీస్ స్టేషన్లో సమాచారం అందించాలని ఆయన సూచించారు.