వాస్తవ నేస్తం ఆదిలాబాద్ : పేదరికం ఆ విద్యార్థి పట్టుదలను ఆపలేకపోయింది. అరకొర వసతులు, ఆర్థిక ఇబ్బందులు ఉన్నా.. చదువుపై ఉన్న మక్కువతో ఆ అబ్బాయి అసాధారణ విజయాన్ని అందుకున్నాడు. ఆదిలాబాద్ జిల్లా కేంద్రంలోని గౌతమ్ మోడల్ స్కూల్ లో పదవ తరగతి చదువుకున్న షేక్ జయాన్, నిన్న వెలువడిన ఎస్సెస్సీ ఫలితాల్లో అద్భుతమైన మార్కులు సాధించి అందరి దృష్టిని ఆకర్షించాడు.
మార్కుల వేటలో జయాన్ జోరు..
మొత్తం 600 మార్కులకు గాను 580 మార్కులు సాధించి జిల్లాలోనే ఒక టాపర్గా నిలిచాడు జయాన్. చిన్నప్పటి నుండి క్రమశిక్షణతో చదువుకుంటూ, ఉపాధ్యాయుల సూచనలను పాటిస్తూ ఈ స్థాయికి చేరుకున్నాడు. నిన్న ఫలితాలు వెలువడగానే జయాన్ మార్కులను చూసి కుటుంబ సభ్యులతో పాటు స్కూల్ యాజమాన్యం హర్షం వ్యక్తం చేస్తోంది.
షేక్ జయాన్ ఒక సాధారణ పేద కుటుంబానికి చెందిన విద్యార్థి. తండ్రి కష్టార్జితంతో కుటుంబాన్ని పోషిస్తున్నప్పటికీ, కొడుకును ఉన్నత చదువులు చదివించాలనే తపనతో జయాన్ను ప్రోత్సహించారు. తండ్రి పడుతున్న కష్టాన్ని కళ్లారా చూసిన జయాన్, ఎలాగైనా మంచి మార్కులు సాధించి తన కుటుంబానికి పేరు తీసుకురావాలని నిశ్చయించుకున్నాడు. ఆ సంకల్పమే నేడు అతడిని 580 మార్కుల విజేతగా నిలబెట్టింది.
తన విజయానికి సహకరించిన తల్లిదండ్రులకు, గౌతమ్ మోడల్ స్కూల్ ప్రిన్సిపాల్ మరియు ఉపాధ్యాయ బృందానికి జయాన్ కృతజ్ఞతలు తెలిపాడు. భవిష్యత్తులో మరిన్ని ఉన్నత శిఖరాలను అధిరోహించి, సమాజానికి సేవ చేయడమే తన లక్ష్యమని ఈ విద్యార్థి పేర్కొన్నాడు. జయాన్ సాధించిన ఈ విజయం జిల్లాలోని ఎంతో మంది పేద విద్యార్థులకు స్ఫూర్తిదాయకంగా నిలుస్తోంది. ప్రతిభ ఎవరి సొత్తు కాదని, పట్టుదల ఉంటే ఆకాశమే హద్దుగా రాణించవచ్చని జయాన్ నిరూపించాడు. ఈ మేధావి భవిష్యత్తులో ఉన్నత స్థాయికి ఎదగాలని కోరుకుందాం.