వాస్తవ నేస్తం,వెబ్ డెస్క్: అంతర్జాతీయ మార్కెట్లలో గత వారం వెండి ధరలు ఊహించని స్థాయిలో దూసుకెళ్లాయి. వారం ప్రారంభంలో ఒత్తిడిలో ఉన్న COMEX వెండి ధరలు శుక్రవారం ఒక్కరోజులోనే 5.59 శాతం లాభపడి ఔన్సుకు 79.341 డాలర్ల వద్ద ముగిశాయి. గత వారం ముగింపు ధర 71.300 డాలర్లతో పోలిస్తే వారానికి ఏకంగా 11.27 శాతం పెరుగుదల నమోదవడం మార్కెట్ వర్గాలను ఆశ్చర్యానికి గురి చేసింది.
ఈ అంతర్జాతీయ ర్యాలీ ప్రభావం దేశీయ మార్కెట్పైనా స్పష్టంగా కనిపించింది. MCXలో వెండి మార్చి 2026 ఫ్యూచర్స్ కాంట్రాక్ట్ ధర కిలోకు రూ.2,52,000 స్థాయిలో స్థిరపడింది. డాలర్ బలహీనత ఈ పెరుగుదలకు ప్రధాన కారణంగా నిపుణులు చెబుతున్నారు. వారమంతా బలంగా ఉన్న అమెరికన్ డాలర్, వారాంతంలో లాభాల బుకింగ్ కారణంగా తగ్గుముఖం పట్టడంతో బులియన్ మార్కెట్లకు ఊపు లభించింది.
ఇటీవలే వెండి ధరలు 82.37 డాలర్ల రికార్డు స్థాయిని తాకి కొంత వెనక్కి తగ్గడం, ఇప్పుడు మరో కీలక చర్చకు దారితీసింది. సమీప భవిష్యత్తులో వెండి ధరలు 100 డాలర్లను తాకుతాయా? అనే ప్రశ్న మార్కెట్లో వినిపిస్తోంది. అదే సమయంలో భారత మార్కెట్లో కూడా వెండి ధరలు రూ.3 లక్షల స్థాయికి చేరతాయా అనే ఉత్కంఠ ట్రేడర్లలో నెలకొంది.
కమోడిటీ మార్కెట్ నిపుణుల అభిప్రాయం ప్రకారం వెండి ధరల పెరుగుదల వెనుక డిమాండ్–సరఫరా సమతుల్యంలో జరుగుతున్న నిర్మాణాత్మక మార్పులు కీలకంగా ఉన్నాయి. అమెరికా–వెనిజులా మధ్య పెరుగుతున్న వివాదం కారణంగా పెరూ, చాడ్ వంటి దేశాల నుంచి వెండి సరఫరాలో అంతరాయాలు ఏర్పడుతున్నాయి. దీనికి తోడు 2026 జనవరి 1 నుంచి చైనా వెండి ఎగుమతులపై నిషేధం విధించే అవకాశం కూడా సరఫరాపై ఒత్తిడిని పెంచుతోంది.
మరోవైపు ఎలక్ట్రిక్ వాహనాలు, సౌరశక్తి ప్రాజెక్టులు, ఎలక్ట్రానిక్స్, అలాగే AI సంబంధిత పరిశ్రమల నుంచి పెరుగుతున్న డిమాండ్ వెండిపై అదనపు ఒత్తిడిని సృష్టిస్తోంది. ఈ కారణాల వల్ల వెండి ధరలు వేగంగా పెరుగుతున్నప్పటికీ, ఈ ర్యాలీ ఎప్పటికైనా టాప్ అవుట్ అయ్యే అవకాశం ఉందని నిపుణులు హెచ్చరిస్తున్నారు.
పేస్ 360 చీఫ్ గ్లోబల్ స్ట్రాటజిస్ట్ అమిత్ గోయెల్ మాట్లాడుతూ, US సుప్రీంకోర్టు ట్రంప్ సుంకాలపై తీసుకునే నిర్ణయం బులియన్ మార్కెట్లపై కీలక ప్రభావం చూపుతుందని తెలిపారు. సుంకాల విషయంలో అనిశ్చితులు తొలగితే వెండి, బంగారం ధరలకు మద్దతు లభించే అవకాశం ఉందని, అయితే ఫిబ్రవరి చివరి నాటికి బులియన్ మార్కెట్ టాప్ అవుట్ అయ్యే అవకాశాన్ని కూడా కొట్టిపారేయలేమని ఆయన పేర్కొన్నారు.
టెక్నికల్ విశ్లేషణ ప్రకారం COMEX వెండి ధరలకు 70 డాలర్ల వద్ద కీలక మద్దతు ఉండగా, 84 నుంచి 90 డాలర్ల మధ్య బలమైన అడ్డంకులు ఉన్నాయి. ఈ స్థాయిలను దాటితేనే 100 డాలర్ల లక్ష్యం సాధ్యమయ్యే అవకాశం ఉందని నిపుణుల అంచనా. దేశీయంగా MCX వెండి ధరకు రూ.2,30,000 కీలక మద్దతుగా ఉండగా, రూ.2,65,000 నుంచి రూ.2,90,000 మధ్య ప్రధాన రెసిస్టెన్స్ స్థాయిలుగా గుర్తిస్తున్నారు.
ఈ అడ్డంకులను వెండి ధరలు విజయవంతంగా అధిగమిస్తే, రాబోయే నెలల్లో రూ.3 లక్షల మార్క్ చేరడం అసాధ్యం కాదని విశ్లేషకులు భావిస్తున్నారు. అయితే తక్షణ కొనుగోళ్లలో జాగ్రత్త అవసరమని, ధరలు కీలక మద్దతు స్థాయికి దగ్గరయ్యే వరకు వేచి చూడటం మంచిదని ఆర్థిక నిపుణులు సూచిస్తున్నారు.
Author: QAMAR SD