త్రిషను చూసి ముఖం తిప్పుకున్న సీఎం విజయ్.. లండన్ రేసింగ్ ఈవెంట్‌లో ఆసక్తికర దృశ్యం!

తమిళనాట సినిమాకు, రాజకీయాలకు విడదీయరాని అనుబంధం ఉంది. వెండితెరపై మెరిసిన తారలు రాజకీయాల్లోకి రావడం, ముఖ్యమంత్రులుగా పగ్గాలు చేపట్టడం అక్కడ దశాబ్దాలుగా వస్తున్న ఆనవాయితీ. ఎంజీఆర్, కరుణానిధి, జయలలిత నుంచి మొదలుపెడితే.. విజయకాంత్, కమల్ హాసన్, దళపతి విజయ్ వరకు ఈ ప్రస్థానం కొనసాగుతూనే ఉంది. అయితే, తాజాగా లండన్ వేదికగా తమిళ రాజకీయ, సినీ వర్గాల్లో ఆసక్తికరమైన చర్చకు దారితీసిన ఒక పరిణామం చోటుచేసుకుంది. ప్రస్తుతం తమిళనాడు ముఖ్యమంత్రి హోదాలో ఉన్న విజయ్ లండన్ పర్యటనలో ఉన్నారు. అక్కడ జరుగుతున్న ఓ ప్రతిష్టాత్మక రేసింగ్ ఈవెంట్‌కు ఆయన హాజరయ్యారు.

ఈ రేసింగ్‌లో పాల్గొంటున్న మరో అగ్ర హీరో అజిత్‌ను విజయ్ కలుసుకోవడం విశేషం. ఇద్దరు స్టార్ హీరోలు ఆప్యాయంగా పలకరించుకున్న వీడియోలు సోషల్ మీడియాలో ట్రెండింగ్‌గా మారాయి. రాజకీయాలు, సినిమాలకు అతీతంగా ఇద్దరు అగ్రనటులు కలుసుకోవడంతో విజయ్, అజిత్ అభిమానులతో పాటు సగటు సినీ ప్రేక్షకులు సైతం ఈ దృశ్యాలను చూసి మురిసిపోయారు.

అనుకోని ఎంట్రీ.. అసౌకర్యంగా ఫీలైన విజయ్!

ఒకవైపు అజిత్‌తో విజయ్ కలయిక నెట్టింట పాజిటివ్ వైబ్స్ నింపితే.. అదే ఈవెంట్‌లో జరిగిన మరో సంఘటన ఇప్పుడు హాట్ టాపిక్‌గా మారింది. గ్యాలరీలో నిలబడి రేసింగ్ ఈవెంట్‌ను ఆసక్తిగా వీక్షిస్తున్న సీఎం విజయ్ వద్దకు, అగ్రకథానాయిక త్రిష అకస్మాత్తుగా వచ్చారు.

ఆమెను గమనించిన వెంటనే విజయ్ తన ముఖాన్ని పక్కకు తిప్పుకుని, అక్కడి నుంచి కాస్త పక్కకు తప్పుకున్నట్లు ప్రస్తుతం వైరల్ అవుతున్న వీడియోలో స్పష్టంగా కనిపిస్తోంది. త్రిష ఆకస్మిక రాకతో విజయ్ ఇబ్బంది పడినట్లు, తీవ్ర అసౌకర్యానికి గురైనట్లు ఈ వీడియో ద్వారా తెలుస్తోంది. గతంలో వీరిద్దరి పేర్లు సినీ, రాజకీయ వర్గాల్లో పలుమార్లు ప్రముఖంగా వార్తల్లో నిలిచిన నేపథ్యంలో.. తాజా సంఘటన తమిళనాట రాజకీయ, సినీ వర్గాల్లో మరింత చర్చనీయాంశంగా మారింది.